Маълумки, Президентимизнинг Республика ҳудудларини тоифаларга ажратиш ва тадбиркорликни қўллаб-қувватлашнинг табақалаштирилган тизимини жорий этиш чора-тадбирлари тўғрисидаги фармони қабул қилинди. Унга асосан Мингбулоқ тумани 5-тоифага киритилди.

Бугун Мингбулоқ тумани маркази Жомашуй шаҳарчасидаги Логистика марказида туманни ижтимоий-иқтисодий ривожлантириш ва 5-тоифадан чиқариш бўйича тақдимот ва тадбиркорлар билан учрашув бўлиб ўтди.

Учрашувда вилоят ва туман сектор раҳбарлари, тижорат банклари, ОАВ вакиллари, тадбиркор ва инвесторлар иштирок этди.Учрашувни вилоят ҳокими Шавкатжон Абдуразаков очди ва туманни ҳар томонлама ривожлантириш учун барча имкониятлар етарли экани, айниқса фармон билан берилган имтиёз ва преференциялар тадбиркорлар учун ҳудуд жозибадорлигини янада ошириши муқаррар эканини таъкидлади.

Шундан сўнг, давлат солиқ бошқармаси вакили 2023 йил 1 январдан 2026 йил 1 январга қадар солиқ солишнинг табақалаштирилган тартиби билан таништирди.

Туман ҳокими ва сектор раҳбарлари туманда янги иш ўринлари яратиш бўйича амалга оширилиши режалаштирилган лойиҳалар тақдимотини ўтказди. 2023 йилда 31075 та доимий янги иш ўринларини яратиш ва аҳолини бандлигини таъминлаш режалаштирилган. Шундан, тадбиркорликни ривожлантириш ва камбағалликни қисқартириш йўналишида 5 732 нафар, ҳудудий инвестиция лойиҳалари ҳисобига 1 588 нафар, қишлоқ хўжалигида 23 755 нафар мингбулоқликлар бандлиги таъминланади.

Учрашувда ҳудудий имкониятлардан самарали фойдаланган ҳолда ривожлантириш драйверларини аниқлаш, муқобил энергия манбаларидан фойдаланган ҳолда электр станциялари барпо этиш каби устувор вазифаларга тўхталиб ўтилди.